GBT > Sløkkiútgerð > Brandávaringar

Roykalarmur
Bíligasta lívstryggingin er helst at gera íløgur í ein ella fleiri roykalarmar. Sum oftast er tað roykurin, ið drepur og ikki eldurin. Tískil er tað av stórum týdningi, at ein varnast roykin so skjótt sum møguligt.
Roykalarmar kunnu møguliga ikki forða eldinum í at birtast, men teir kunnu vera við til at avmarka skaðan og at bjarga mannalívum.
Roykalarmar eru bíligir og finnast í ymiskum sniðum, men virka tó allir á sama hátt og eru lættir at seta upp.

Uppsetan av roykalarmum
Roykalarmar verða settir upp undir loftið, so tætt við miðjuna á rúminum sum møguligt. Teir skulu vera í minsta lagi 30 cm frá vegginum og frá lampum. Les vegleiðingina - sum fylgir við roykalarminum – væl. Tryggja tær at roykalarmurin verður settur upp har tú hevur møguleika fyri at hoyra hann – eisini um tú svevur. Hevur tú sjónvarp á kamarinum, eigur tú eisini at hava roykalarm har.

Tú eigur í minsta lagi at hava ein roykalarm á hvørji hædd í húsunum og ein í hvørjum sovikamari.